Baki, FinanceTime. 2017-ci ilin 28 mart tarixində mədəniyyət və turizm naziri Əbülfəs Qarayev Portuqaliya Respublikasının Azərbaycan Respublikasındakı Fövqəladə və Səlahiyyətli Səfiri Paula Leal da Silvanı qəbul etdi.
Görüşdə Azərbaycan və Portuqaliya arasında mədəniyyət və turizm sahələri üzrə əməkdaşlıq məsələləri müzakirə olundu.
Əbülfəs Qarayev Portuqaliya Respublikasının mədəniyyət nazirindən ünvanlanmış dəvətə görə təşəkkür etdi və cari ilin may ayının ortalarında Portuqaliyaya səfərinin nəzərdə tutulduğunu bildirdi.
Görüş zamanı sözügedən səfər çərçivəsində ölkəmizin zəngin mədəni irsinin təbliğatı ilə yanaşı Azərbaycan Respublikasının turizm şirkətlərinin iştirakı ilə ölkəmizin turizm potensialının təqdimatının təşkilinin zəruriliyi qeyd olundu.
Həmçinin iki ölkə arasında mədəniyyət və turizm sahələrində əməkdaşlığa dair müvafiq hüquqi bazanın yaradılması istiqamətində görülən işlər müzakirə edildi.
Cənab Nazir tərəfindən Portuqaliya Respublikasının rəsmilərinə ünvanlanmış cari ilin 4-6 may tarixində Bakı şəhərində 4-cü dəfə təşkil olunacaq Ümumdünya Mədəniyyətlərarası Dialoq Forumunda iştiraka dair dəvət məktubları Səfirə təqdim olundu.