Baki, FinanceTime.  Kapital bazarından maliyyələşməni təşviq edən məlumat və məsləhət xidmətləri proqramı – “Listinq Məsləhət Proqramı” (LMP) üzrə əməkdaşlıq haqqında Kollektiv Sazişə yeni tərəfdaş olaraq Azərbaycanda İxracın və İnvestisiyaların Təşviqi Fondu -  “Azpromo” qoşulmuşdur.

Bununla əlaqədar olaraq, 25 Sentyabr 2017-ci il tarixində BFB-nin İdarə Heyəti sədri Vüqar Namazov və Azpromo şirkətinin prezidenti Rüfət Məmmədov tərəfindən “Listinq Məsləhət Proqramı” -na qoşulma haqqında saziş imzalanmış və bu münasibətlə BFB-də “Açılış zəngi” mərasimi keçirilmişdir.

Əməkdaşlıq haqqında Sazişə əsasən LMP-na  qoşulmuş şirkətlərin AZPROMO-nun müvafiq kataloqlarına daxil edilməsi, eyni zamanda mövcud şirkətlərin Bakı Fond Birjası ilə əlaqələndirilməsi, xarici investor bazarına çıxışın təmin edilməsi, eləcədə xarici investorların ölkənin qeyri-neft sektorunun inkişafına cəlb edilməsi istiqamətində potensial  investorların müəyyən edilməsi, biznes mühitinin təkmilləşdirilməsi, BFB vasitəsilə kapital bazarlarına  xarici investorların cəlb edilməsi həyata keçiriləcəkdir.

İmzalama mərasimində BFB-nin İdarə Heyəti sədri Vüqar Namazov Azpromo ilə əməkdaşlıq əlaqələrinin qurulmasının və bu sahədə qarşılıqlı səylərin birləşdirilməsinin yerli bazara müsbət təsir göstərəcəyinə inandığını bildirdi.

Azpromo şirkətinin prezidenti Rüfət Məmmədov ölkəmizə xarici investorların cəlb edilməsi, o cümlədən yerli ixracla məşğul olan şirkətlərin istehsal potensialın artırılması istiqamətində investisiyaların cəlb edilməsi üçün zəruri olan bilik və bacarıqların artırılmasına dəstək göstərilməsi istiqamətində görülən işlərin genişləndirilməsində BFB ilə əməkdaşlıq əlaqələrin qurulmasının qarşıya qoyulmuş hədəflərə nail olmaqda uğurlu olacağını qeyd etdi.

LMP layihəsinin Azpromo da daxil olmaqla hazırda 14 tərəfdaşı mövcuddur: KPMG, Baker&Tilly, PwC, RSM Azərbaycan və EY audit şirkətlərinin Azərbaycan ofisləri; Dentons, Baker&McKenzie və LAN Law Chambers hüquq şirkətlərinin Azərbaycan ofisləri, Yüksək Texnologiyalar Parkı, investisiya şirkətləri olan Paşa Kapital MMC, İnvest-AZ MMC, AzFinance İnvest MMC və Unicapital ASC.

 Listinq Məsləhət Proqramı sahibkarlıq düşüncə tərzinin formalaşdırılması, listinqin və kapital bazarlarının təşviqi, şirkətlərdə korporativ idarəetmənin tətbiqi, kapital bazarı alətləri vasitəsilə yerli şirkətlərə investisiyaların cəlb edilməsi istiqamətində həyata keçirilir.