“Sığortalı gənclik” layihəsi çərçivəsində Azərbaycan Texniki Universitetində tələbələrə sığorta təlimi keçirilib. Azərbaycan Sığortaçılar Assosiasiyasının və Azərbaycan Tələbə Gənclər Təşkilatları İttifaqının (ATGTI) təşkilatçılığı və “Buta Sığorta”nın tərəfdaşlığı ilə keçirilən tədbirdə universitetin 60 tələbəsi iştirak edib.

Sığortaçılar Assosiasiyasından AZƏRTAC-a bildiriblər ki, ASA nümayəndələri tədbir iştirakçılarına layihənin məqsədi və sığorta ilə bağlı maariflənmənin əhəmiyyətindən danışıblar.

Tələbələrə, həmçinin sığortanın tarixi, dünya sığorta bazarında gedən proseslər, Azərbaycanın sığorta sektorundakı mövcud vəziyyətlə bağlı geniş məlumat verilib, sığortanın mahiyyəti və onun faydaları barədə danışılıb.

Görüşdə tələbələrin sığorta ilə bağlı sualları cavablandırılıb, onlarla fikir mübadiləsi aparılıb. İştirakçılar sığorta sahəsinə aid maraqlı fikirlər səsləndiriblər. İştirakçılar təlimi maraqla qarşılayıb və faydalı məlumatlar əldə etdiklərini bildiriblər.

Xatırladaq ki, “Sığortalı gənclik” layihəsi Maliyyə, Gənclər və İdman nazirliklərinin dəstəyi ilə həyata keçirilir.

www.azertag.az