Milanda Azərbaycanın investisiya imkanları müzakirə olunub

Azərbaycan gələcəyə hədəflənmiş uğurlu iqtisadi siyasət həyata keçirməkdədir. Təbii ehtiyatlarla zəngin olan Azərbaycan artıq bütün dünya tərəfindən Avropa ilə Asiyanı birləşdirən körpü kimi tanınır. Son illər investisiya yatırımlarına görə cəlbedici ölkəyə çevrilən Azərbaycanda “yaşıl” iqtisadiyyatın inkişafı da diqqət mərkəzindədir. Məhz bu mövzular avqustun 25-də “Milan Expo 2015” beynəlxalq sərgisi çərçivəsində “Azərbaycana investisiya yatırımları: biznes mühiti və imkanlar” mövzusunda keçirilmiş tədbirdə müzakirə olunub.

Azərbaycan İxracın və İnvestisiyaların Təşviqi Fondunun (AZPROMO) və İtaliya–Azərbaycan Ticarət İnstitutunun (İTAZERCOM) birgə təşkilatçılığı ilə keçirilmiş tədbir İtaliya şirkətlərinə Azərbaycan iqtisadiyyatı, ölkəmizdəki əlverişli biznes və investisiya mühiti ilə yaxından tanış olmağa imkan yaradıb.

İTAZERCOM-un prezidenti xanım Manuella Traldi çıxış edərək İtaliyanın uzun illər Azərbaycan ilə yüksək səviyyəli iqtisadi əlaqələri olduğunu vurğulayıb. Bildirilib ki, yeni iqtisadi sahələrin inkişafına diqqət yetirilməsi bu ölkənin maraqlı cəhətlərindən biridir. İTAZERCOM ölkələrimiz arasında bu münasibətlərin inkişafına mühüm töhfələr verməkdədir.

AZPROMO-nun rəhbəri Rüfət Məmmədov tədbir iştirakçılarını Azərbaycanın iqtisadi inkişaf göstəriciləri barədə məlumatlandırıb. Diqqətə çatdırılıb ki, ölkəmizdə xarici ticarət dövriyyəsinin həcmi gündən-günə artır və qeyri-neft sektoru sürətlə inkişaf edir. Bütün bu amillər Azərbaycanı investisiya yatırımları üçün cəlbedici ölkəyə çevirib. Ölkəmiz istehsalın şaxələndirilməsi istiqamətində mühüm addımlar atır. Bu da Azərbaycanın qlobal rəqabətqabiliyyətlilik indeksinə görə dünya ölkələri arasında ön sıralarda olmağına gətirib çıxarır.

Sonra Sumqayıt Kimya Sənaye Parkı və Balaxanı Sənaye Parkı ilə bağlı “yaşıl iqtisadiyyata” həsr olunmuş təqdimat keçirilib.

Sumqayıt Kimya Sənaye Parkı barədə məlumat verən qurumun nümayəndəsi Samir Məmmədov müəssisənin 2011-ci ildə istifadəyə verildiyini və tam fəaliyyətə başlanması ilə 5000-7000 iş yerinin açılacağını diqqətə çatdırıb. Bildirilib ki, parkın ərazisində kimya və sənaye sahəsində ixtisaslaşmış şirkətlər fəaliyyət göstərəcəklər. Şirkətlərin buradakı fəaliyyətini stimullaşdırmaq məqsədilə hökumətimiz onların ilk 7 il ərzində vergidən azad olmalarına qərar verib.

Daha sonra Xarici Ticarət üzrə İnstitutun prezidenti Rikkardo Monti çıxış edərək rəhbərlik etdiyi qurumun Bakıda ofisinin açılacağını bildirib. Diqqətə çatdırılıb ki, qurum Azərbaycana investisiya yatırmağa maraq göstərən İtaliya şirkətlərinin fəaliyyətinə də öz dəstəyini göstərəcək.

İtaliyanın ətraf mühit nazirinin diplomatik müşaviri Stefano Marquçio vurğulayıb ki, ölkələrimiz arasında müvafiq istiqamətdə əlaqələr durmadan inkişaf etməkdədir. Tədbir bu əməkdaşlığın perspektivlərini müzakirə etmək baxımdan böyük əhəmiyyət daşıyır.

Tədbirdə, həmçinin informasiya və kommunikasiya texnologiyaları, aqrokimya, mexanika, ətraf mühit, sənaye, tikinti və digər sahələrdə Azərbaycanın investisiya imkanları müzakirə olunub. Azərbaycanın biznes imkanlarının bu formatda təqdim olunduğu tədbir İtaliyada ilk dəfə keçirilib.