Baki, FinanceTime. Azərbaycan Sığortaçılar Assosiasiyası İctimai Birliyinin (Birlik) Hüquq komitəsinin görüşü keçirilib. Görüşdə Birliyin sədri Mustafa Abbasbəyli, sədr müavini Vüqar Əliyev, Birliyin əməkdaşları və Hüquq komitəsinin üzvü olan sığorta və təkrarsığorta şirkətlərinin Hüquq departamentinin müdirləri və hüquqşünasları, eləcə də, İcbari Sığorta Bürosunun nümayəndələri iştirak edib.
Görüşün əsas müzakirə mövzusu kompensasiya ödənişi ilə bağlı İcbari Sığorta Bürosuna qarşı qaldırılmış sığorta tələbi olub. Belə ki 2014-cü ildə baş vermiş, bir nəfərin ölümü və bir nəfərin az ağır yaralanması ilə nəticələnən avtonəqliyyat qəzası ilə bağlı zərərçəkən şəxsə ödəniləcək kompensasiya ödənişi gərgin müzakirəyə səbəb olub. “İcbari Sığortalar haqqında” Qanunun 19-cu maddəsinə müvafiq olaraq, zərərvuran tərəflərdən birinin sığortaçısı tərəfindən ölümlə bağlı 5000 AZN, yaralanan şəxsin müalicəsi ilə bağlı 1500 AZN sığorta haqqı ödənilməsinə baxmayaraq, qəzada iştirak edən digər zərərvuran tərəfin icbari sığorta müqaviləsi olmadığı üçün zərərçəkən şəxs müvafiq olaraq İcbari Sığorta Bürosuna (İSB) müraciət edib. Lakin İSB zərərçəkən şəxsə “İcbari Sığortalar haqqında” Qanunun 33.5-ci maddəsinə əsaslanaraq qarşı tərəfin sığortaçısı tərəfindən artıq sığorta ödənişi olunmasını vurğulayaraq sığorta ödənişini etməkdən imtina etdiyini bildirib.
Məsələnin mübahisəli olması onun Birliyin Hüquq komitəsində də müzakirəsi zərurətini yaradıb. İclasda iştirak edən sığorta şirkətlərinin nümayəndələri arasında iki mövqe formalaşıb. Bir tərəf zərərçəkənin Mülki Məcəllə və “İcbari Sığortalar haqqında” Qanuna əsasən kompensasiya ödənişi almaq hüququnun olduğunu bildirsə də, digər tərəf zərərçəkənin artıq kompensiya ödənişinin aldığını qeyd edərək Mülki Məcəllə və “İcbari Sığortalar haqqında” Qanunun müvafiq maddələrinə istinad edərək İSB-nin mövqeyini müdafiə edib.
İclasın yekununda Hüquq komitəsi məsələnin vətəndaş tərəfindən məhkəmədə mübahisələndirilməsinin tövsiyə olunması ilə əlaqədar rəy bildirib və bu cür hadisələrə “vahid metodoji yanaşmanın təmin olunması prinsipi”nə əməl edilməsi məqsədilə qanunvericiliyə dəyişikliyə dair təkliflər hazırlanması qərara alınıb.
