Baki, Finance Time.  AXA MBASK sığorta şirkəti bu ilin may ayında respublikanın şimal-qərb bölgəsində baş vermiş zəlzələlərdən ziyan çəkən müştərilərinə altı ödəmə həyata keçirdi. Ödəmələrin ümumi məbləği 80 min manatdan çox oldu.

Belə ki, Mətanət Səmədovaya (Zaqatala) 42.000 manat, Könül Həmidovaya (Şəki) 13.200 manat, Rəmziyə Süleymanovaya (Şəki) 1.200 manat, Hikmət Qafarova (Şəki) 8.677 manat, Adil Süleymanova (Şəki) 9.243 manat və Nərminə Rəsulovaya (Şəki) 7.725 manat ödənildi.

Qeyd edək ki, bütün ödəmələr maksimum qısa müddət ərzində həyata keçirildi ki, bu da AXA MBASK şirkətinin zərərlərin keyfiyyətli və operativ tənzimlənməsi strategiyasının uğurla tətbiq edildiyini sübut edir.

Xatırladaq ki, Azərbaycan Milli Elmlər Akademiyası Respublika Seysmoloji Xidmət Mərkəzinin məlumatına görə bu ilin may ayının əvvəllərində Zaqatala şəhəri yaxınlığında dörd yeraltı təkan baş vermiş, nəticədə onlarla ev ciddi zədələnmişdi. İlk yeraltı təkan şəhərin 17 kilometr cənub-qərbində baş verib. Zaqatala və Qax rayonları ərazisində zəlzələnin gücü 7 ball, Şəki, Oğuz, Qazax, Tovuz və başqa rayonlarda isə 2-5 ball olub. Zəlzələnin mərkəzi 11 kilometr dərinlikdə yerləşir. Sonrakı təkanların isə gücü Rixter cədvəlilə 4,5, 4,2, 4,0 ball olub.