Beynəlxalq Miqrasiya Təşkilatının Azərbaycan nümayəndəliyi hazırda Koreya Beynəlxalq Əməkdaşlıq Agentliyinin (KOICA) maliyyə dəstəyi ilə “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsinin icrasını həyata keçirtməkdədir. Bu günlərdə BMqT-nin nümayəndələri kəhrizlərin bərpasının monitorinqini aparmaq üçün layihənin həyata keçirildiyi Ağdam rayonunda yerləşən Əhmədağalı, Mirəşelli və Çinarlı kəndlərinə səfər edərək bu ərazidə yerləşən kəhrizlərdə aparılan bərpa işlərlər ilə tanış olmuşlar. Onlar həmçinin Aghdam rayonu ərazisində kəhrizlərin bərpası ilə məşğul olan kənkanlarla (kəhriz ustaları) da görüşmüşlər. 

Qeyd edək ki, adı çəkilən dörd illik layihə çərçivəsində məcburi köçkünlərin də sıx məskunlaşdığı Ağdam, Ağcabədi, Bərdə, Fuzuli, Gəncə, Qazax, Goranboy və Göygöl rayonlarının ərazisində 40-a yaxın kəhrizin bərpası vasitəsilə bu ərazidə yaşayan 8 mindən artıq ailəni təhlükəsiz və davamlı su ilə təmin etmək məqsədini daşıyır. Layihə kəhrizlərin bərpası ilə yanaşı, yerli icmaların dayanıqlığının artırılması, icmalarda məşğulluğun inkişafı və tədrisi də özündə cəmləşdirən komponentlərə malikdir.