25 iyun tarixində BMqT-nin Azərbaycan nümayəndəliyi layihə tərəfdaşları, mütəxəssislər, müxtəlif nazirlik, dövlət təşkilatları (Prezident Administrasiyası, Nazirlər Kabineti, İqtisadiyyat Nazirliyi, Kənd Təsərrüfatı Nazirliyi, Ekologiya Nazirliyi, Qaçqınların və Məcburi Köçkünlərin İşləri üzrə Dövlət Komitəsi, Meliorasiya və Su Təsərrüfatı ASC, AZƏRSU ASC) və təhsil qurumlarını təmsil edən nümayəndələrin iştirakı ilə kəhriz konsepsiyasını, onun sosial-iqtisadi və hüquqi aspektini, kəhriz konsepsiyasını milli su idarəetmə siyasətinə daxil edilməsinin zəruriliyini ölkədəki su ehtiyatlarından səmərəli istifadəyə dair ümumi müzakirələr çərçivəsində nəzərdən keçirtmək üçün Azərbaycanda Kəhrizlər üzrə Milli Baş Planı mövzusunda onlayn seminar keçirdi.
Görüş iştirakçılarını salamlayan BMqT-nin Azərbaycan nümayəndəliyinin rəhbəri Vladimir Qyorqiyev nümayəndəliyin Koreya Beynəlxalq Əməkdaşlıq Agentliyinin (KOICA) maliyyə dəstəyi ilə həyata keçirdiyi “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihəsinin əhəmiyyətini vurğuladı. O, təşkilatın qeyd olunan layihədən də əvvəl 20 ilə ərzində ölkə ərazsisindəki kəhrizlərin bərpa işlərini həyata keçirdiyini və BMqT-nin qazanılmış təcrübəyə əsaslanaraq hazırlanmış kəhrizlərin bərpasını dair Milli Baş Planın layihəsini açıq müzakirəyə təqdim etməyə hazır olduğunu qeyd etdi: “Bu günkü tədbir zamanı kəhrizlərin bərpası, Azərbaycanda kəhriz sisteminin sosial-iqtisadi və ekoloji əhəmiyyəti, qanunvericilik baxımından kəhrizlərin mülkiyyətçilik məsələləri ilə əlaqədar əsas problemlər və müvafiq tövsiyələr hökümət orqanları və təhsil qurumlarının nümayəndələri ilə paylaşılacaq”.
Müstəqil ekspertlər tərəfindən layihə qrupu ilə sıx əməkdaşlıq şəraitində işlənib hazırlanmış Azərbaycanda kəhrizlərin bərpası üzrə Milli Baş Plan kəhriz ənənələrini su təchizatı sistemi və su ehtiyatlarının idarəedilməsi ilə bağlı yerli siyasətlərə tətbiq etmək məqsədi daşıyır.
Onlayn tədbir kəhrizlərin bərpası layihəsinin, kəhrizlərin bərpası prosesində yeni texnologiyaların tətbiqinin, Azərbaycanda kəhrizlərin bərpası üçün Milli Baş Planın təqdimatı ilə davam etdirildi.
Təqdimatlardan sonra iştirakçılar layihə və Milli Baş Plan haqqında onları maraqlandıran sualları vermək imkanı qazandılar.
Qeyd edək ki, BMqT-nin həyata keçirdiyi “Azərbaycanda kəhriz su sistemlərinin bərpası vasitəsilə məcburi köçkünlərin məskunlaşdığı ərazilərdə kənd yerlərinin kompleks inkişafı” layihə ənənəvi və dayanıqlı su təchizatı sistemi olan kəhrizlərin bərpası vasitəsilə minlərlə ailənin təhlükəsiz və davamlı su təminatı məqsədini daşıyır.
Layihənin ümumi məqsədi Azərbaycanda kənd təsərrüfatı icmalarının enerjisiz su təchizatını təmin etməklə kənd təsərrüfatı məhsuldarlığını və yaşayış imkanlarını artırmaqla məcburi iqtisadi miqrasiyanın qarşısının alınmasına töhfə verməkdir. Kəhrizlərin bərpası ilə yanaşı, layihə gender, idarəetmə və ətraf mühitin davamlılığı kimi məsələlərə xüsusi diqqət yetirərək, icma tərəfindən idarə olunan bir yanaşmanı tətbiq etməyə davam edir.
Layihədə Kəhrizlər üzrə Milli Baş Planın hazırlanması, kəhrizlərin bərpası, kəhriz mühəndisliyi və kankanların bacarıqlarının inkişafı, hədəf bölgələrdəki məcburi köçkünlər arasında kiçik sahibkarlığın dəstəklənməsi, kəhrizdən istifadə və sudan səmərəli istifadə barədə ictimaiyyətin məlumatlandırılmasını nəzərdə tutan 6 əsas komponent nəzərdə tutulur.
