“PAŞA Həyat Sığorta” ASC 2013-cü ildə sığorta haqqı yığımlarını 17 milyon manata çatdırmağı planlaşdırır.
AzərTAc xəbər verir ki, bu barədə şirkətin risklərin idarə olunması şöbəsinin müdiri Pərviz Quliyev fevralın 1-də keçirilmiş mətbuat konfransında məlumat vermişdir.

O bildirmişdir ki, 2012-ci il ərzində 14,697 milyon manata yaxın sığorta haqqı toplanmışdır ki, bunun da 9,432 milyon manatı icbari sığorta, 5,264 milyon manatı könüllü sığorta növlərinin payına düşür.

Ötən il toplanan sığorta haqları 2011-ci ildə əldə olunan yığımların həcmindən 80 faiz çoxdur.
Vurğulanmışdır ki, 2012-ci ildə icbari sığorta növü üzrə (istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta) 263 min manat, könüllü sığorta növləri (kredit götürən şəxslərin həyat sığortası və həyatın yaşam sığortası) üzrə isə 95,877 min manata yaxın ödəniş həyata keçirilmişdir.

www.azertag.com