Baki, Finance Time. Toplantıya Azərbaycan Respublikası Mərkəzi Bankının Hüquq Departamentinin Direktoru Azərbaycan Respublikasının əməkdar hüquqşünası xanım Rəna Məlikova da qatılmışdır.

Toplantının gündəliyinin əsasını bankların üzləşdiyi əhəmiyyətli hüquqi risklərin və problemlərin müzakirəsi və onların həlli yollarının tapılması, banklarda hüquq işinin risk idarəetməsi konsepsiya əsasında yenidən baxılması  mövzuları təşkil etmişdi.

Toplantıda bank sektorunun hüquqşunaslarını maraqlandıran mövzular ətrafında müzakirələr aparılmış, Mərkəzi Bankın və bankların müzakirə edilən mövzularla bağlı mövqeləri səsləndirilmiş, hüquqi məsələlərlə bağlı yaranmış suallar cavablandırılaraq təkliflər dinlənilmişdir.

Banklarda hüquqi auditin və hüquq işinin idarəetmə standartlarının müəyyən olunması və bu məsələlərin qanunvericilik səviyyəsində təsbit olunması zəruriliyi vurğulanmışdır.

Azərbaycan Respublikası Mərkəzi Bankının Hüquq Departamentinin Direktoru xanım Rəna Məlikova müzakirə edilən məsələlərin həllində öz səlahiyyətləri daxilində yardımçı olacağını və bankları narahat edən məsələləri aidiyyati instansiyalara çatdıracağını bildirmişdir.

Yekunda belə toplantıların, hüquq sahəsində problemlərin vaxtında ortaya çıxarılması və həllində vahid yanaşma və təcrübə mübadiləsi baxımından vacibliyi qeyd olunmuş və müntəzəm olaraq Dəyirmi masa formatında təşkil edilməsi qərara alınmışdır.

Bankların hüquqşünas menecerlərinin Dəyirmi masasının sədri “AtaHolding” ASC-ninin Hüquq Departamentinin Direktoru, “AtaBank” ASC-nin İdarə Heyətinin Sədrinin müşaviri, ARPA Direktorlar Şurasının üzvü Qorxmaz Ağayev seçilmişdir.

Dəyirmi masaların rüblük əsasda keçirilməsi nəzərdə tutulur. Növbəti Dəyirmi masanın keçirilməsi bu ilin sentyabr ayına təsadüf edəcək.