Baki, Finance Time.  “PAŞA Həyat Sığorta” şirkəti tələbələr arasında “Azərbaycan cəmiyyətinin həyat sığortasına olan marağı: milli həyat sığortası bazarının xarici bazarlarla müqayisəsi” mövzusunda yazı müsabiqəsi elan edir.

Şirkətin İctimaiyyətlə Əlaqələr Xidmətindən verilən məlumata görə, müsabiqə Azərbaycanda fəaliyyət göstərən bütün ali təhsil ocaqlarının tələbələrinə şamil olunur.

Şərtlərə görə, yazı müsabiqəsinə bu ilin may ayının 20-dən start veriləcək və iyun ayının 20-i məqalələrin son qəbulu günü olacaq. Müsabiqədə iştirak etmək istəyən tələbələr hazırladıqları yazıları ehuseynguluyev@pasha-life.az elektron ünvanına göndərə bilərlər. Təqdim olunan yazılar üçün minimum və maksimum hədd nəzərdə tutulmayıb.

Müsabiqədə birinci yerin qalibinə 300 manat, ikinci yerə 200 manat, üçüncü yer üçün isə 100 manat məbləğində pul mükafatı və “PAŞA Həyat”ın hədiyyələri təqdim ediləcək.

Bundan başqa, müsabiqədə birinci yerə layiq görülmüş məqalə müəllifin imzası ilə KİV-də dərc ediləcək.

Müsabiqədə yer tutmuş qaliblər üçün xüsusi təqdimetmə mərasimi təşkil olunacaq.

“PAŞA Holding” Şirkətlər Qrupunun üzvlərindən biri olan “PAŞA Həyat Sığorta” ASC 2011-ci il fevral ayının 14-dən fəaliyyət göstərir. Cari ilin may ayının 1-nə şirkətin nizamnamə kapitallının həcmi 40,250 mln. manat təşkil edir. Hazırda şirkət müştərilərə istehsalatda bədbəxt hadisələrdən icbari sığorta, həyatın müddətli sığortası, yığım tərkibli yaşam sığortası, hətta sağalmaz xəstəliklərdən sığorta və digər könüllü  həyat sığortası məhsulları təklif  edir.