06-07 oktyabr 2022-ci il tarixlərində Tükiyənin paytaxtı Ankarada Beynəlxalq Miqrasiya Təşkilatının (IOM) Türkiyə və Azərbaycandakı nümayəndəliklərinin birgə təşkilatçılığı ilə iki günlük təlim və təqdimat sessiyası keçirilib.

Tədbir Beynəlxalq Miqrasiya Təşkilatının İnkişaf Fondu tərəfindən maliyyələşdirilən Miqrasiya üzrə Regional Təlim Mərkəzi (MRTM) layihəsi çərçivəsində təşkil edilib. Layihənin məqsədi miqrasiyanın idarə edilməsi üzrə regional təlim imkanlarının və əməkdaşlığın genişləndirilməsi, təhlükəsiz miqrasiyanın təmin edilməsi üçün onun idarə olunması sahəsində qabaqcıl təcrübələrin və ən uğurlu nümunələrin bölüşülməsidir.

Müvafiq dövlət qurumlarının əməkdaşlarının iştirakı ilə keçirilən tədbir IOM Azərbaycanın layihə koordinatoru Mətanət Qəhrəmanovanın MRTM layihəsinin gələcək perspektivlərinə dair giriş nitqi ilə başlayıb. Daha sonra IOM məsləhətçisi İzabel Astor MRTM kurrikulumu mövzusunda qısa təqdimat edib.

Tədbirin əsas hissəsində IOM Türkiyənin əmək miqrasiyası və insan inkişafı bölməsinin rəhbəri Yelda Devlet Karapınar beynəlxalq miqrasiyaya giriş mövzusunda danışıb. 

MRTM təlimçisi Ali Can Sarıca qeyri-qanuni miqrasiyanın qarşısının alınmasının zəruriliyi, miqrasiya üzrə beynəlxalq və regional hüquq və siyasət çərçivələri, qeyri-qanuni miqrasiya ilə mübarizədə beynəlxalq və regional əməkdaşlıq və bu sahədəki uğurlu təcrübələr üzrə təqdimatlarla çıxış edib.

Öz təqdimatı zamanı Serra Albayrakoğlu iştirakçıları prossesual təminatlar, miqrasiya prosesində həssas şəxslərin müəyyən edilməsi, eyni zamanda beynəlxalq qorunmaya müraciət etməli olan şəxslərin yönləndirilməsi mövzularında məlumatlandırıb.  

Təlim sessiyasının iştirakçıları Türkiyənin Miqrasiya İdarəsi Baş Müdirliyinin nümayəndəsi . Hünkar Burkan İbinin könüllü qayıdışa yardım və reinteqrasiya və davamlı reinteqrasiya mövzusunda çıxışını dinləyiblər. 

Miqrasiya İdarəsi Baş Müdirliyinin nümayəndəsi Ekin Sevil Gürünlü iştirakçılara qaçaqmalçılıq və insan alveri qurbanlarının qorunması və Miqrasiya İdarəsi Baş Müdirliyinin insan alveri ilə mübarizədəki rolundan danışıb. 

İzabel Astorun “Yumşaq təlim bacarıqları. Təlimçilər üçün təlim sisteminin komponentləri və təlimçinin rolu” mövzusunda təqdimat edib.

Bundan əvvəl isə IOM Azərbaycan Bakıda və Daşkənddə oxşar mövzularda iki günlük təlim təlim sessiyası keçirib.