ARDNŞ xarici ölkələrdə iri layihələrə investisiyaların yatırılması ilə bağlı xeyli işlər görmüşdür. 

AzərTAc xəbər verir ki, bu sözləri Azərbaycan Dövlət Neft Şirkətinin vitse-prezidenti Süleyman Qasımov Xəzər-Avropa İnteqrasiya İşgüzar Klubunun üzvləri ilə görüşdə demişdir.
 
S.Qasımov bildirmişdir ki, ARDNŞ-in Türkiyədə “Petkim” şirkətinin özəlləşdirilməsində iştirak edərək səhmlərin 51 faizini almışdır. Eyni zamanda, şirkət qonşu Gürcüstanın da neft və qaz satışı sahəsinə sərmayə qoymuşdur. Ümumilikdə Gürcüstan layihələrinə 500 milyon dollar, Türkiyəyə isə 2 milyard dollardan çox yatırımlar edilmişdir. Gələcək layihələrimizə Türkiyədə emal gücü ildə 10 milyon ton neft olan Egey neft emalı zavodunun tikintisi daxildir. Bu zavodun inşasına təxminən 5-6 milyard ABŞ dolları məbləğində sərmayənin yatırılması gözlənilir. 

ARDNŞ rəsmisi əlavə etmişdir ki, bu məsələ ilə əlaqədar hüquq və maliyyə şirkətləri tərəfindən müqavilələr hazırlanır, məsləhətləşmələr aparılır. Gələcəkdə maliyyənin mənbəyi müəyyənləşdirildikdən sonra layihə həyata keçiriləcəkdir.

www.azertag.com