ASK-nın Tikinti üzrə Komissiyası Sektorda Baş Verən Son Hadisələri Müzakirə Etdi

Azərbaycan Sahibkarlar Konfederasiyasının İnşaat və tikinti materialları istehsalı müəssisələri ilə iş komissiyasının iclası keçirilib. İclasda vətəndaşların əmlak hüquqları, tikintidə təhlükəsizlik məsələləri, aparılan yoxlamalar müzakirə olunub. Hündür mərtəbəli yaşayış binalarının tikintisi ilə məşğul olan şirkətlərlə vətəndaşlar arasında yaranan mübahisəli məsələlər və çıxış yolları ətrafında geniş fikir mübadiləsi aparılıb.

İclasda Yasamal Melissa Park-da baş verən hadisə ilə bağlı video nümayiş olunub. Tikinti şirkətləri bu hadisənin səbəbləri və çıxış yolları haqqında fikir və rəylərini bölüşüblər. Komissiya üzvləri bildiriblər ki, konkret bu hadisədə tikinti şirkətinin atdığı addım etik və praktik deyil. Paytaxtda gedən tikinti prosesləri zamanı müəyyən ərazidə sakinlərin 70-80 faizi köçürüldüyü halda, bir neçə sakinin razılaşmaq istəməməsi ciddi problemlər yaradır. Sahibkarlar hesab edirlər ki, bununla bağlı müvafiq qanunvericilik bazasının təkmilləşdirilməsi və uyğun prosedurların müəyyən edilməsinə böyük ehtiyac var. Yalnız bu halda vətəndaş və sahibkar üz-üzə qalmayacaq, tikinti prosesində çəkilən əlavə xərclər, xüsusən də işlər başlamasa da sahibkarın ödədiyi kirayə haqları, götürdüyü kreditlər üzrə faizlər nəticədə daşınmaz əmlak bazarında formalaşan maya dəyərin artmasına səbəb olur. Hətta bir neçə analoji halda tikinti şirkətləri müflisləşmə ilə üzləşiblər. Ona görə də tikinti şirkətləri müəyyən qiymətləndirmə əmsallarının hazırlanmasını və köçürülmə proseslərinin də buna uyğun həyata keçirilməsini təklif edirlər.

Komissiyanın sədri Şahin Məmmədov səsləndirilən təkliflərin sənəd halında işlənərək müvafiq dövlət qurumlarına təqdim edilməsi barədə açıqlama verib. Sonra tikintidə təhlükəsizlik qaydaları ilə bağlı standartların tətbiqi məsələsinə toxunulub və Komissiya üzvlərinə bu qaydalardan irəli gələn məsələlərə ciddi yanaşmaq tövsiyə edilib. Ş.Məmmədov bildirib ki, bədbəxt hadisələrin baş verdiyi iqtisadi sektorların önündə məhz tikinti sektoru gəldiyindən hər bir şirkət təhlükəsizlik riski üzrə ümumi dəyərləndirmə həyata keçirməlidir.

İclasda bəzi yoxlayıcı qurumların özəl şirkətlərdə apardığı yoxlamalara da diqqət yetirilib. Xüsusən də avadanlıqların yoxlanılması, şirkətlərə məxsus yük maşınlarının hərəkəti zamanı qanunsuzluq hallarının olduğu bildirib. İclas gündəlikdə qoyulan məsələlər üzrə real təkliflərin sistemləşdirilməsi ilə işini başa çatdırıb.