18 aprel 2025-ci il tarixində Bakı Fond Birjasının nümayəndə heyəti STP Şirkətlər Qrupunun nümayəndələri ilə Sumqayıt Texnologiyalar Parkında görüşüb.  

Bu görüş STP Şirkətlər Qrupu ilə Bakı Fond Birjası arasında mövcud olan əməkdaşlıq memorandumu çərçivəsində baş tutub. Memorandum eyni zamanda Azərbaycan Respublikasında qiymətli kağızlar bazarının inkişafı və şirkətlərin yerli kapital bazarları vasitəsilə maliyyəşməsinin təşviqi istiqamətində atılmış addımların tərkib hissəsi olan Listinq Məsləhət Proqramını (LMP) da əhatə edir. LMP çərçivəsində Bakı Fond Birjası iştirakçı şirkətin ehtiyaclarına uyğun birja fəaliyyəti və qiymətli kağız buraxılışı ilə əlaqədar məsləhət xidmətlərinə dəstək olur, LMP tərəfdaşlarının kapital bazarlarına dair təşkil etdiyi təlimlərə dəvət edir, üzv investisiya şirkətləri barədə iştirakçıya ətraflı məlumat verir, qiymətli kağızların emissiyası ilə bağlı digər tövsiyələr verir.

Sonda Bakı Fond Birjasının nümayəndə heyəti «STP Polymer»   və «STP Global Cable» müəssisələrini ziyarət edərək hər iki şirkət arasında qurulmuş əməkdaşlığın gücləndirilməsi istiqamətində addımları müzakirə ediblər.